एसइई ः प्यूठानमा १३० परीक्षार्थी अनुपस्थित

  अनुज पछाई , प्यूठान । प्यूठानमा माध्यमिक शिक्षा परीक्षा (एसइई) मा १३० परीक्षार्थी अनुपस्थित भएका छन् । नियमिततर्फ छात्रा ६९ र छात्र ५६ गरी १२०, प्राबिधिक धारको ग्रेडवृद्धितर्फ १० जना अनुपस्थित भएको शिक्षा विकास तथा समन्वय एकाइका प्रमुख शिबराज पण्डितले बताएका छन । परीक्षामा जिल्लामा १६ केन्द्र निर्धारण गरिएको छ भने १६ केन्द्राध्यक्ष,सहायक केन्द्राध्यक्ष, निरीक्षक, परीक्षा सहायक, कार्यालय सहयोगी र सुरक्षाकर्मी परिचालन गरिएको छ । विद्यार्थीको सङ्ख्या चार हजार ३९३ भए पनि पहिलो दिन १३० विद्यार्थी अनुपस्थित रहेको कार्यालयले जानकारी दिएको छ । परीक्षा सञ्चालनका लागि प्रदेश परीक्षा व्यवस्थापन समिति, परीक्षाको अनुगमनदेखि उत्तरपुस्तिका परीक्षण, संपरीक्षण र रुजुको कामसमेत गरिएको छ । परीक्षाका लागि प्रदेश परीक्षा व्यवस्थापन समितिमार्फत जिल्ला परीक्षा समन्वय समितिलाई परिचालन गरिएको छ । जिल्लामा पहिलो दिन शान्त वातावरणमा मर्यादित रुपमा परीक्षा भएको छ । विगत दुई वर्ष कोभिड–१९ को महामारीले सञ्चालन हुन नसकेको परीक्षा यस वर्ष भने विद्यार्थीको भौतिक उपस्थितिमा भएको छ । शुक्रबार पहिलो दिन अनिवार्य अङ्ग्रेजी विषयको परीक्षा भएको छ । परीक्षा वैशाख २० गतेसम्म परीक्षा सञ्चालन हुनेछ ।