प्युठान।माण्डवी गाउँपालिकामा वडा ३ मा वडा स्तरीय खेलकुद प्रतियोगिता सुरु भएको छ।‘‘स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ सञ्चालन भएको वडा स्तरीय खेलकुद प्रतियोगितामा पुरुष क्रिकेट प्रतियोगिता तथा पुरुष/महिला भलिबल प्रतियोगिताको सोमबार उद्घाटन भएको हो।
माण्डवी गाउँपालिका ३ वडा कार्यालयको आयोजनामा १२ गते देखि १३ गते सम्म सञ्चालन हुने खेलकुद प्रतियोगितामा माण्डवी गाउँपालिका ३ वडाका भलिबल र क्रिकेट खेलाडिहरुले भाग लिएको माण्डवी गाउँपालिका ३ का वडाध्यक्ष धनेन्द्र कार्कीले जानकारी दिए।
कार्यक्रम उद्घाटन गर्दै माण्डवी गाउँपालिकाका अध्यक्ष तथा कार्यक्रमको प्रमुख अतिथि नमराज अधिकारी (रोशन)ले खेल प्रतिस्पर्धा मात्र नभएर स्वास्थ्यको लागि आवस्यक रहेको बताएका थिए।
माण्डवी गाउँपालिका ३ मार्सिबाङ स्थित खेलकुद मैदानमा भएको खेलकुद प्रतियोगितामा पुरुष क्रिकेट तर्फ ८ टिम, पुरुष भलिबल तर्फ १० टिम र महिला भलिबल तर्फ ६ टिम दर्ता भएको आयोजकले बताएको छ।
दर्ता भएका टिमहरू बिच प्रतिस्पर्धा हुने खेलमा पुरुष क्रिकेट प्रतियोगिता प्रथम पुरस्कार १५ हजार रुपैयाँ,दोस्रो पुरस्कार १० हजार र तेस्रो पुरस्कार ५ हजार रहनेछ। त्यस्तै पुरुष /महिला भलिबल तर्फ प्रथम पुरस्कार १५ हजार,दोस्रो १० हजार र तेस्रो पुरस्कार ५ हजार नगद सहित मेडल र प्रमाण पत्र व्यवस्था गरिएको आयोजकले बताएको छ।
