गुल्मी प्रहरीले कब्जा गर्‍यो ४६ थान बन्दुक, जनताले बुझाए ६ थान

स्वर्गद्धारी अपडेट , प्यूठान . गुल्मी प्रहरीले हतियार राख्नेहरुको घर–घरमै पुगेर ४६ थान हतियार कब्जा गरेको छ । वैशाख ३० मा हुने स्थानीय तहको निर्वाचनलाई मर्यादित र सुरक्षित बनाउन प्रहरीले ति हतियार कब्जा गरेको हो । निर्वाचनलाई लक्षित गर्दै जिल्ला प्रशासन कार्यालय गुल्मीले लाईसेन्स प्राप्त हतियार राखेकाहरुलाई चैत मसान्तसम्म हतियार बुझाउन आग्रह गरेको थियो । जिल्लामा लाइसेन्स प्राप्त ५२ थान हतियार मध्ये प्रशासनले जारी गरेको सूचनाको समय अवधि सम्म जम्मा ६ वटा मात्र हतियार बुझाएका थिए । हतियार राख्नेहरुले नबुझाएपछि प्रहरीले घरघरमै पुगेर हतियार जम्मा गरेको हो । प्रशासनले जारी गरेको सूचनालाई अटेरी गर्दै हतियार नबुझाए पछि गुल्मी प्रहरी हतियार खोज्न गाउँगाउँमा लागेको र दर्ता भएका सबै हतियारहरु जम्मा भएको जिल्ला प्रहरी कार्यालय गुल्मीका प्रहरी नायव उपरीक्षक माधब खरेलले जानकारी दिए । हतियारधनिले बुझाएका ६ र प्रहरीले कब्जा गरेको ४६ गरी जम्मा भएका ५२ हतियारहरु मध्ये प्राय एकनाले भरुवा बन्दुक रहेको जिल्ला प्रशासन कार्यालय गुल्मीले जनाएको छ । जिल्ला प्रशासन कार्यालयमा दर्ता भएका हातहतियारहरु मध्ये अधिकांश भरुवा बन्दुक  रहेको प्रशासनले जनाएको छ ।