भुवन केसी
प्युठान।आरम्भ चौतारी लघुवित्त वित्तीय संस्था लिमिटेडद्वारा वित्तीय संस्थामा आवद्ध सदस्यहरुलाई १ दिने पशु पालन तालिम प्रदान गरेको छ।आरम्भ चौतारी लघुवित्त वित्तीय संस्था बाग्दुला शाखाको आयोजनामा उक्त तालीम प्रदान गरिएको हो।
आइतबार कार्यक्रमको प्रमुख अथिति रहेका नेत्र बहादुर केसीले उक्त तालिमको उद्घाटन गरेका थिए।तालिमको उद्घाटन गर्दै केसीले पशुपालन क्षेत्र ग्रामीण अर्थतन्त्रको आधारस्तम्भ भएकाले महिलाहरूले सीपयुक्त रूपमा पशुपालन अपनाएमा जीवनस्तर उकासिने बताए।
सुलिचौर स्टेशन म्यानेजर राजु कवरको अध्यक्षतामा रहेको कार्यक्रममा विशिष्ट अतिथि प्रहरी वरिष्ठ नायब निरीक्षक चन्द्रबहादुर घर्ति मगर, अतिथि समाजसेवी शिवबहादुर पाण्डे लगायतको उपस्थिति रहेको थियो।कार्यक्रमको सञ्चालन केशब कुमालले र स्वागत मन्तव्य शाखा प्रमुख प्रतिक्षा महराले प्रस्तुत गरेकी थिईन।
उक्त १ दिने पशु तालिममा प्युठान नगरपालिकाको कार्यालयका पशु सेवा शाखाका पशु डाक्टर विष्णु केसीले प्रशिक्षक दिएका थिए।बाग्दुला शाखाअन्तर्गत रहेका ४५ वटा सक्रिय केन्द्रका सदस्यहरू सहभागी भएकामा तालिम विशेष प्रभावकारी बनेको आयोजकले जनाएको छ।प्रशिक्षक केसीले बाख्रा तथा भैंसी पालनका व्यवहारिक पक्ष — सही खोर निर्माण, पोषण व्यवस्था, रोग पहिचान र उपचार, खोप तालिका तथा बजार व्यवस्थापन — सम्बन्धी विस्तृत प्रशिक्षण दिएका हुन्।
अध्यक्ष कवरले जीवन बीमा, समूह मजबुती र पशुपालनबाट आयवृद्धिका सम्भावनाहरूबारे जानकारी दिए।कार्यक्रममा उत्कृष्ट केन्द्रहरूलाई सम्मान समेत गरिएको थियो।
सम्मानित केन्द्रहरूमा सफल ०३६ चुजा, ०२५ बुकीडाँडा, ०३४ जृमृकाडाँ, ०३७ खोलीगाउँ र ०२० चुन्दरी खोला परे। साथै विभिन्न विधाबाट ५ वटा केन्द्रलाई विशेष सम्मान प्रदान गरिएको थियो।
