स्वर्गद्वारी अपडेट अनलाईनले ईलाका प्रशासन कार्यालय जस्पुर प्युठानका प्रमुख बाबुराम पुरी संगको अंतरंग कुराकानीको सारसंक्षेप यहाँ प्रस्तुत गरेका छौ ।
तपाईलाई स्वर्गद्वारी अपडेटमा स्वागत छ।धन्यवाद , सर्वप्रथम ईलाका प्रशासन कार्यालय जस्पुरको काम कारवाही सम्बन्धमा चासो राख्दै सो सम्बन्धमा आम नागरिक सरोकारवालाहरु एवं आदरणिय सेवाग्राही तथा उपभोक्ता महानुभावहरु समक्ष कार्यालयको तर्फबाट केहि कुरा राख्ने मौका प्रदान गर्नुभएकोमा यहाँ र यहाँको संचारमाध्यम प्रति मेरो व्यक्तिगत तथा कार्यालयको तर्फबाट हार्दिक आभार प्रकट गर्न चाहन्छु ।आम नागरिकको सुसुचित हुन पाउने संविधान प्रदत्त अधिकारको सम्मान गर्दै कार्यालयले प्रदान गर्ने सेवाहरु एवं कार्यालयको कार्यसम्पादनको सम्बन्धमा सेवाग्राही महानुभावहरु, शुभ चिन्तकहरु तथा प्रत्यक्ष परोक्ष रुपमा सरोकार राख्नुहुने आम सरोकारवाला पक्षहरु समक्ष जानकारी दिनु कार्यालयको कर्तव्य रहेको र यो अवसर प्राप्त भएकोमा तपाइको लोकप्रिय अनलाईन स्वर्गद्वारी अपडेट तथा यहाँप्रति विशेष आभार प्रकट गर्दछु ।
ईलाका प्रसासनबाट दिईने मुख्य सेवाहरु के के हुन् ? स्थानिय प्रशासन तथा शान्ति सुरक्षा सम्बन्धि सेवा नामथर उमेर आदी प्रमाणित ,नाबालकको उमेर प्रमाणित ,नाबालक परिचय पत्र प्रदान गर्ने । दलित आदीबासी जनजाती सिफारिस, स्थानिय प्रहरी कार्यालयको अनुगमन सुपरिवेक्षण तथा नियन्त्रण , भ्रष्टाचार सम्बन्धी निवेदनहरुको प्रारम्भिक रुपमा बुझ्ने कार्य गरि प्रमुख जिल्ला अधिकारी समक्ष पेश गर्ने ,स्थानिय स्तरमा शान्ति सुरक्षा कायम गर्ने ,स्थानिय प्रशासन ऐन बमोजिम गर्नुपर्ने कार्यको प्रारम्भिक कार्य गर्ने,स्थानिय प्रहरी कार्यालयको काम कारवाहीमा रेखदेख नियन्त्रण एवं सुपरिवेक्षण गर्ने ,गैर सामाजिक र अपराधिक गतिविधि हुन नदिने ,स्थानिय विकास आयोजनाहरुलाई आवश्यक टेवा पुर्याउने ,प्रचलित कानुन बमोजिम नाता प्रमाणित गर्ने ,आदीबासी जनजाती उत्थान राष्ट्रिय प्रतिष्ठान ऐन २०५८ बमोजिमका सिफारिसहरु प्रमाणित गर्ने ,दलित जातीको प्रमाणित गर्ने ।कार्यालयको कार्यक्षेत्र भित्रका बजारहरुको अनुगमन तथा निरिक्षण गर्ने,कार्यालयको कार्यक्षेत्र भित्रका सरकारी कार्यालयहरुको दुई पाङ्ग्रे सवारी साधनहरुलाई सार्वजनिक विदाका दिनमा सरकारी कामकाजका लागी सवारी पास दिने ,हात हतियार लाईसेन्स प्रतिलिपी बनाउन र संघ संस्था दर्ता तथा नविकरणका लागी निवेदन पेश भएमा सोको लागी जिल्ला प्रशासन कार्यालय प्युठानमा सिफारिस गरि पठाउने ,कार्यालयको अभिलेख तथा संस्थागत स्मरण व्यवस्थापन गर्ने ,जिन्सी तथा स्टोर सम्बन्धी कामकाजहरु गर्ने ,अन्य विविध सिफारिसहरु गर्ने ।
ख) राहदानी सम्बन्धी सेवा - द्रुत राहदानी सेवाको लागी सिफारिस ,राहदानी विभागबाट जारी भई आएका राहदानी वितरण
ग) नागरिकता सम्बन्धी सेवा - वंशजको आधारमा नागरिकताको प्रमाण पत्र जारी गर्ने ,नागरिकताको प्रमाणपत्रको प्रतिलिपी जारी गर्ने,नागरिकतामा थर ठेगाना वा अन्य विवरण फरक परेमा संशोधन गर्ने ,वैवाहिक अंगिकृत नागरिकताको विषयमा छानविन गरि प्रमुख जिल्ला अधिकारी समक्ष पेश गर्ने ,नागरिकताको प्रमाणपत्रमा आवश्यक प्रमाण बुझी पतिको नामथर कायम गरिदिने ,जिल्ला प्रशासन/ ईलाका प्रशासन कार्यालयहरुबाट माग भए बमोजिम नागरिकताको अभिलेख प्रमाणित गरि पठाउने ।
घ) ठाडो उजुरी सम्बन्धी सेवा - गुनासो वा ठाडो उजुरी को प्रारम्भिक कार्य गरि श्रीमान प्रमुख जिल्ला अधिकारी समक्ष पेश गर्ने ।
ङ) बजार अनुगमन/ निरिक्षण/ सुपरिवेक्षण - सहज आपूर्ति व्यवस्था सुनिश्चिताका लागी बजार अनुगमन तथा नियमन ,आवश्यक बस्तु नियन्त्रण ऐन तथा आवश्यक सेवा संचालन ऐन सम्बन्धि काम गरि सोको जानकारी जिल्ला प्रशासन कार्यालयमा पठाउने ।उपभोक्ता संरक्षण ऐन /नियमावली बमोजिम निरिक्षण अधिकृतको भूमिका निर्वाह गर्ने ।
कार्यालयको सेवा सम्बन्धी विस्तृत जानकारीको लागी कार्यालयको वेवसाईट मा राखिएको नागरिक वडापत्रको अध्यन गर्नुहुन समेत अनुरोध गर्दछु । स्थानीय सरकार संग कसरि समन्यव गर्नु भएको छ ,या के कस्ता सहयोगको अपेक्षा गर्नु भएको छ ?कार्यालयको कार्यक्षेत्र भित्र तीन वटा स्थानिय तहहरु रहेका छन ।माण्डवी गाउँपालिका, सरुमारानी गाउँपालिका तथा स्वर्गद्धारी नगरपालिका भित्रका सेवाग्राहीहरुलाई कार्यालयले सेवा प्रदान गर्दै आइरहेको छ । स्थानिय सरकार स्थानिय जनताले देख्न, सुन्न र अनुभव गर्न सक्ने उनिहरुको घरदैलोमै रहेको सरकार पनि हो । अत स्थानिय सरकारहरु सँग जनताको अपेक्षा बढी हुनु स्वभाविक पनि हो । सेवाप्रवाहको दौरान यस कार्यालयको कार्यक्षेत्र भित्रका स्थानिय सरकारहरु सँग यस कार्यालयले पनि आवश्यक समन्वय एवं सहकार्य गर्दै आइरहेको छ । कार्यालयको कार्यक्षेत्र भित्रका तीनवटै स्थानिय सरकारहरु सँग निरन्तर सम्पर्क ,समन्वय एवं सहकार्य गरि यस कार्यालयबाट प्रदान गरिने सेवा प्रवाहलाई अझ परिष्कृत सहज ,सरल एवं झन्झटरहित बनाउँदै लैजाने दिशामा कार्यालय प्रतिबद्ध रहेको र सो कार्यमा स्थानिय सरकारहरुको सहयोगको अपेक्षा समेत गरेको छ।स्थानिय सरकारहरु सँग सेवा प्रवाहको सन्दर्भमा खासगरी वडाअध्यक्षज्यूहरु तथा वडा सचिवहरु जो सेवा प्रवाहको फ्रन्टलाईनमा खटिनुहुन्छ उहाँहरु सँग निरन्तर रुपमा सम्पर्कमा रहि नागरिकता लगायत कार्यालयले प्रदान गर्नुपर्ने सेवा सम्बन्धी विषयमा कार्यालयले अन्तरक्रिया ,संवाद एवं सहकार्य गर्दै आएको छु । कार्यालयमा सेवा लिनको लागी आउनुहुने सेवाग्राहीहरु महानुभावहरुको कागजातमा कुनै समस्या भएमा यथाशिघ्र सम्बन्धित वडा कार्यालयमा सम्पर्क गरि जानकारी लिने, आवश्यक समन्वय गरिदिने तथा नपुग कागाजात कार्यालयको ईमेल, भाईबर वा अन्य जुनसुकै माध्यमबाट भए पनि पठाउन लगाई सेवाग्राही लाई पुन: वडा कार्यालयमै जानुपर्ने अवस्था आउन नदिने प्रति कार्यालय अत्यन्त सजग समेत रहेको छ ।
चाडपर्वलाई लक्षित गरि अनुगमन गरिदै छ ,के अनुगमन गर्न चाडपर्व नै कुर्नु पर्ने हो ?यस कार्यालयलाई नेपाल सरकार वाणिज्य आपुर्ति तथा उपभोक्ता संरक्षण विभागबाट प्राप्त निरिक्षण अधिकृत को जिम्मेवारी तथा श्रीमान् प्रमुख जिल्ला अधिकारी बाट प्रत्यायोजित अधिकारको सिमाभित्र रहि यस कार्यालयबाट निरन्तर रुपमा बजार अनुगमन गर्ने कार्य हुँदै आइरहेको छ ।बजार अनुगमन गर्न चाडपर्व नै कुर्नुपर्ने हो भन्ने प्रश्न को सन्दर्भमा अनुगमन गर्न पक्कै पनि चाडपर्व नै कुर्नु पर्दैन र परेको छैन पनि । बजार अनुगमन केबल चाडपर्व लक्षित मात्र नभई नियमित रुपमा भई नै रहनेछ र चाडपर्वको समयमा बजार अलि चलायमान हुने र उपभोक्ताहरुको हित प्रतिकुलका क्रियाकलाप तुलनात्मक रुपमा बढि हुने हुँदा कार्यालयको सक्रियता तथा निगरानी अन्य समयमा भन्दा पक्कै पनि बढि नै हुनेछ । अनुचित ब्यापारिक/व्यावसायिक क्रियाकलाप नगर्न , मिसावट, अखाद्य पदार्थको बिक्रि वितरण नगर्न, तोकिएको अधिकतम खुद्रा बिक्रि मुल्य भन्दा बढिमा बिक्रि वितरण नगर्न यस कार्यालबाट सार्वजनिक सुचना समेत प्रकाशन गरि सम्बन्धित सबैमा सुचना समेत दिईएको छ ।यस कार्यालयको कार्यक्षेत्र भित्रका स्थानिय बजारहरुको हालसालै गरिएको अनुगमनको क्रममा फेला परेका केफियतहरुको सन्दर्भमा सुधार गर्न निर्देशन दिईएको अवधि पश्चात उक्त उद्योग/व्यावसायहरुको फ्लोअप गरिने र पुन: कैफियत देखिएमा तत्कालै जरिवाना लगायतका कडा कदम चालिनेछ ।
अन्त्यमा के भन्न चाहनुहुन्छ ?अन्त्यमा संविधान प्रदत्त उपभोक्ता हित संरक्षणको लागी ईलाका प्रशानसन कार्यालय जस्पुर सदैव चनाखो, सतर्क र सक्रिय बन्दै बजार अनुगमनलाई अझ प्रभावकारी र नतिजमुखी बनाउने कुरामा प्रयासरत रहनेछ । कार्यालयको यस अभियानमा यहाँहरु जस्तो जिम्मेवार संचारकर्मीहरु, आम उपभोक्ता महानुभावहरु, स्वयं उद्योगी/व्यावसायीहरु , नागरिक समाज को समेत रचनात्मक सहयोगको अपेक्षा समेत गरेको छु ।
प्रस्तुति : लव कुमार अधिकारी
