प्यूठानमा गठबन्धनको निरन्तर संबाद निष्कर्षबिहिन,कांग्रेस माओबादी बीच अधिकासं पालिकामा तालमेल

  अनुज पछाई , प्यूठान । निरन्तर तालमेलको गृहकार्यमा जुटेका दलहरुबीचको तालमेलको प्रयास निष्कर्षबिहिन भएपछि दलहरु पालिका स्तरको छलफलमा जुटेका छन् । जिल्लामा क्रियाशील कांग्रेस, माओबादी, राजमो र समाजबादी बीच केही सातादेखि बिभिन्न ढंगले छलफल चल्दै आएको थियो ।यहाँ स्थित सवै दलहरुको बीचमा भागबण्डा मिल्न नसकेपछि अधिकांश पालिकामा कांग्रेस माओबादीबीचमा तालमेलको कोर्ष अगाडि बढेको छ । प्राप्त जानकारी अनुसार स्वर्गद्वारी नगरपालिकामा नेपाली कांग्रेस, नेकपा माओवादी केन्द्र र राष्ट्रिय जनमोर्चाबीच सहमति भएको छ । नगरपालिकाको प्रमुख र ३ वटा वडा कांग्रेसलाई, उपप्रमुख सहित ४ वटा वडा राष्ट्रिय जनमोर्चालाई तथा नेकपा माओवादी केन्द्रलाई २ वटा वडा अध्यक्ष दिने सहमति भएको छ । यो पालिकामा गठबन्धनका एकीकृत समाजवादी र जनता समाजवादी पार्टीलाई भागबण्डामा सामेल गराइएको छैन । त्यस्तै झिमरुक गाउँपलिकामा नेपाली कांग्रेस र नेकपा माओवादी केन्द्रबीच तालमेल गर्ने सहमति भएको छ । यसअघि राष्ट्रिय जनमोर्चाले जितेको यस गाउँपालिकामा राष्ट्रिय जनमोर्चा, एकीकृत समाजवादी र जनता समाजवादीलाई सामेल नगराई दुई दल मात्रै मिलेर प्रतिस्पर्धा गर्ने समझदारी गरेका हुन् । पालिका अध्यक्ष माओवादीले र उपाध्यक्ष कांग्रेसले लिने समझदारी भएको छ । वडाअध्यक्ष तथा सदस्यहरु दुई दलको आपसी समझदारीका आधारमा टुंगो लगाइने बताइएको छ । माओवादीले पालिका अध्यक्षमा पितबहादुर एमसी र कांग्रेसले उपाध्यक्षमा प्रमोद पोखरेल उठाउने तयारी गरेको छ । यस्तै सरुमारानी गाउँपालिकामा नेपाली कांग्रेस, नेकपा माओवादी केन्द्र र नेकपा एकीकृत समाजवादीबीच मात्रै तालमेल भएको छ । सहमति अनुसार अध्यक्ष नेपाली कांग्रेसले र उपाध्यक्ष माओवादी केन्द्रले पाउने छ । पालिकाको ४ वटा वडाध्यक्ष माओवादीलाई, तथा कांग्रेस र एकीकृत समाजवादीलाई एक–एक वडा दिने गरी सहमति भएको छ । यहाँ पनि राष्ट्रिय जनमोर्चा र जनता समाजवादी पार्टीलाई सिट बाँडफाँटमा सहभागी गराइएको छैन । यसैगरी माण्डवीमा पनि गठबन्धनका दलहरुबीच सहमति जुटेको छ । प्यूठान नगरपालिकामा पनि कांग्रेस र माओबादी बीचमा सहमति कायम गर्ने प्यास भइरहेको छ । भने पछिल्लो बिकसित परिस्थिति हेर्दा अन्य पालिकामा पनि कांगेस र माओबादी बीच तालमेल हुने संभावना बढेर गएको छ । यता एमालेले भने गठबन्धनभित्र फूट ल्याउन लागि परेको गठबन्धन स्रोतले जनाएको छ ।