देउखुरी।दाङको राप्ती गाउँपालिका शिक्षा क्षेत्रमा लुम्बिनी प्रदेशकै उत्कृष्ट गाउँपालिकाको रूपमा सम्मानित भएको छ। देशभरका सामुदायिक विद्यालयका प्रधानाध्यापकहरूको संस्था ‘प्रिन्सिपल्स एसोसिएसन अफ नेपाल’ (प्यान) ले शिक्षा क्षेत्रमा उल्लेखनीय योगदानका आधारमा राप्तीलाई छनोट गर्दै सम्मान प्रदान गरेको हो।
प्यानले शिक्षा क्षेत्रमा अतुलनीय योगदान पुर्याएका उत्कृष्ट पालिका, विद्यालय र प्रधानाध्यापकहरूलाई पुरस्कृत गर्न गठित मूल्यांकन समितिको सिफारिसमा राप्ती गाउँपालिकालाई लुम्बिनी प्रदेशको उत्कृष्ट पालिकाको रूपमा छनोट गरि पुरस्कृत गरेको हो। संस्थाले शुक्रबार पोखरामा आयोजना गरेको दोस्रो राष्ट्रिय सम्मेलनको अवसरमा आयोजित भव्य समारोहमा शिक्षा, विज्ञान तथा प्रविधि मन्त्री रघुजी पन्त र प्यानका अध्यक्ष सुदाम प्रसाद गौतमले राप्ती गाउँपालिकाका प्रवक्ता तथा वडा नं. २ का वडाध्यक्ष पहलवान चौधरी, वडा नं. ६ का वडाध्यक्ष दीपक कुमार चौधरी, र शिक्षा, युवा तथा खेलकुद शाखाका प्रमुख विश्वास विकलाई संयुक्त रूपमा सम्मानपत्र प्रदान गरेका थिए
गाउँपालिकाका अध्यक्ष प्रकाश विष्टले उक्त सम्मानप्रति खुशी व्यक्त गर्दै शिक्षा क्षेत्रको समग्र सुधारलाई निरन्तर प्राथमिकतामा राख्दै आएको बताए।“हामीले शिक्षालाई खर्च होइन, लगानीका रूपमा लिएका छौं। आधारभूत पूर्वाधारदेखि गुणस्तरीय सिकाइ वातावरण निर्माणसम्म, सबै पक्षमा योजना अनुसार अघि बढिरहेका छौं,” उनले भन-‘ शिक्षामा लगानीको प्रतिफल तत्काल देखिँदैन, तर दीर्घकालीन रूपमा यसले सक्षम पुस्ता निर्माण गर्छ, जसले देशलाई परिवर्तन गर्न सक्छ।’ सबै विद्यालय, शिक्षक, अभिभावक, विद्यार्थी तथा स्थानीय तहका जनप्रतिनिधिको साझा प्रयासबाट पालिका यो सम्मानको हकदार बनेको भन्दै अध्यक्ष बिष्टले सबैप्रति आभार व्यक्त गरेका थिए ।
