प्यूठानबाट ९० हजार बढी किलो जडीबुटी निकासी

अनुज पछाई,प्यूठान । प्यूठानमा एक वर्षको अवधिमा विभिन्न प्रजातिका करिब ९० हजार जडीबुटी जिल्ला बाहिर निकासी भएको डिभिजन कार्यालय प्यूठानले जनाएको छ । अत आव २०७८÷७९ मा राष्ट्रिय तथा निजी वनमा गरेर ९० हजार ४०९ किलो जडिबुटि जिल्ला बाहिर निकासी भएको छ । राष्ट्रिय वनबाट एक बर्षमा २६ हजार ५०३ किलो विभिन्न ७ प्रजातिका जडिबुटी बिक्रि हुदा २ लाख ४५ हजार ७५० रुप्रया राजश्व सङकलान भएको डिभिजन वन कार्यालय प्यूठानका सहायक वन अधिकृत दिपक केसीले जानकारी दिए । यस्तै निजी वनबाट ६३ हजार ९०६ किलो जडीबुटी निकासी भएको उनको भनाई छ । उनका अनुसार निजीवनबाट जडीबुटी निकासीमा राजस्व नलाग्ने र राष्ट्रिय तथा सामुदायिक वनबाट संकलन गरिएको जडीबुटीको मात्र राजस्व संकलन हुने गर्दछ । त्यस्तै प्यूठानको सामुदायिक वनको खोटोबाट गत आवमा २४ लाख ५२ हजार ५६३ रुपैया बराबरको राजश्व सङकलन गरिएको कार्यालयले जनाएको छ । निजी वनबाट २७ लाख ११ हजार ४१ रुपैया काठबाट राजश्व उठेको छ । अल्लो ,टिमुर, रिट्ठा, तेज पात, दालचिनीको बोक्रा, घोडताप्रे, लोक्ता, पानीअमला,चिराइतो,मलाइगेडा लगायतका जडीबुटी जिल्लाबाट निकासी हुँदै आइरहेको छ । खेर गएको पाखोबारी र कम लगानीमा पनि राम्रो आम्दानी हुने भएपछि जिल्लामा पछिल्लो समय कृषकहरू व्यावसायिक जडीबुटी खेतीमा आकर्षित हुँदै आइरहेका छन् । टिमुर, रिट्ठा, तेज पात लगायतका जडीबुटीका लागि जिल्लाको हावापानी अनुकूल भएकाले पनि कृषकहरू यस प्रति बढी आकर्षित भएको कार्यालयले जनाएको छ ।