सुनाखरी तस्करी गर्ने प्यूठानकी एक महिला पक्राउ

  अनुज पछाई , प्यूठान ।  २५० किलो सुनाखरी जडिबुटी सहित प्यूठानकी एक महिला बाग्लुङमा पक्राउ परेकी छन । शुक्रबार जिल्ला प्रहरी कार्यालय बागलुङले प्यूठानका देवी केसीलाई २५० किलो सुनाखरी जडीबुटीसहित पक्राउ गरेको छ । विशेष सुचनाको आधारमा खटिएको प्रहरीले मालढुङगाबाट केसीलाई पक्राउ गरिएको बागलुङका प्रहरी प्रमुख दयानिधि ज्ञवालीले बताएका छन् । उनले भने, ‘विशेष सूचनाका आधारमा मालढुंगामा चेकजाँच गरेर प्रहरीको टोलीले सुनाखरी र महिलालाई पक्राउ गरेको छ ।’ प्यूठान जिल्लाको स्वर्गद्वारी नगरपालिका– ३ स्थायी घर भएकी केसीलाई फरक–फरक तौल भएका १० बोरा जडीबुटीसहित पक्राउ गरेको एसपी ज्ञवालीले बताएका छन् । महिलालाई शंकास्पद अवस्थामा फेला पारेर बोरा खानतलासी गर्दा खैरो रंगको सुनाखरी जस्तो देखिने जडीबुटी फेलापरेपछि नियन्त्रणमा लिएको विज्ञप्तिमा उल्लेख छ । पक्राउ परेकी केसीले प्रारम्भीक बयानमा बरामद भएको खैरो रंगको जडीबुटी सुनाखरी रहेको उल्लेख गरेको बागलुङका प्रहरी प्रमुख एसपी ज्ञवालीले बताए । बरामद भएको सुनाखरीको बजार मूल्य प्रतिकिलो अन्दाजी ४० देखि ५० हजार पर्ने अनुमान छ । प्रतिकिलो ४० हजार रुपियाँका दरले पनि २५० किलो सुनाखरीको मूल्य १ करोड पर्न सक्ने प्रहरीको अनुमान रहेको छ । पक्राउ परेकी केसीलाई जडीबुटीसहित जिल्ला बन कार्यालय बागलुङलाई आवश्यक कारबाहीका लागि पठाउने तयारी भएको विज्ञप्तिमा उल्लेख छ ।