दाङ। लुम्बिनी प्रदेशका मुख्यमन्त्री चेतनारायण आचार्यले धर्म र संस्कृतिको संरक्षणमा विचलन आएमा समाजमा विकृति र विसंगति भित्रने भन्दै यस्ता प्रवृत्ति रोक्न सबैको साझा जिम्मेवारी रहेको बताउनु भएको छ । हरितालिका तीजको पूर्वसन्ध्यामा राप्ती उपत्यका (देउखुरी) मा आयोजित तीज मिलन तथा शुभकामना आदानप्रदान कार्यक्रमलाई सम्बोधन गर्दै उहाँले पुर्खाले जोगाएको पर्वको मौलिकता कायम राख्नुपर्नेमा जोड दिनुभयो ।
“धर्म र संस्कृतिले समाजलाई अनुशासित र परिवर्तनको दिशामा डो¥याउँछ । तर, विचलनले विकृति निम्त्याउँछ । त्यसैले संस्कृतिको संरक्षण र प्रवद्र्धन हाम्रो साझा कर्तव्य हो,” मुख्यमन्त्री आचार्यले भन्नुभयो । उहाँले तीजलाई अहिले विभिन्न नाममा विकृत बनाउने प्रयास भइरहेको भन्दै यस्ता कार्यले संस्कृतिमाथि प्रहार गरेको टिप्पणी गर्नुभयो ।
कार्यक्रममा प्रमुख सचिव बाबुराम अधिकारीले चाडपर्वले सामाजिक मूल्य–मान्यतालाई जीवन्त राख्ने बताउँदै संस्कृतिको वास्तविक मर्म जोगाउनुपर्ने धारणा राख्नुभयो । त्यस्तै, प्रदेश सचिव ईश्वरराज पौडेलले राज्यको समावेशी नीतिले निजामती सेवामा महिला कर्मचारीको सहभागिता बढेको उल्लेख गर्नुभयो ।
स्वास्थ्य सचिव दुर्गालक्ष्मी श्रेष्ठले तीजलाई ऊर्जाशील पर्वको रूपमा लिइने बताउँदै यसले मानसिक स्वास्थ्यमा सकारात्मक प्रभाव पार्ने र आत्मीय भावनाको विकासमा सहयोग गर्ने विचार व्यक्त गर्नुभयो । “तीजले ऊर्जाशील विचार र पुस्तान्तरणमा महत्त्वपूर्ण भूमिका खेल्छ,” उहाँले भन्नुभयो ।
कार्यक्रममा सहभागीहरूले तीजको सांस्कृतिक महत्त्वलाई जीवन्त राख्दै यसलाई विकृतिबाट जोगाउन सामूहिक प्रतिबद्धता जनाएका थिए ।
