प्युठान।प्युठान नगरपालिका – ७ पुण्यखोला स्थित बिजुवार महिला साना किसान कृषि सहकारी सँस्थाका पुर्व कर्मचारीले संस्थामा भएको बचत रकम अपचलन गरेका छन्।संस्थाका पुर्व कर्मचारी प्रतिमा जी.एम र कमला महतराले १ करोड ३० लाख ५९ हजार ६ सय ५२ रुपैंयाँ रकम अपचलन गरेका हुन्।
संस्थाले सोमबार युगबोध राष्ट्रिय दैनिक पत्रिकामा अपचलन गरेको रकम बुझाउने बारे ३५ दिने सुचना प्रकाशन समेत गरेको छ।तत्कालिन संस्थाका प्रवन्धक प्रतिमा जी.एमले अपचलन गरेको २०८२ असार मसान्तसम्मको साँवा ब्याज गरि जम्मा रकम ५४ लाख १६ हजार ९ सय ५० रुपैंया र दैनिक बचत संकलन गर्ने कर्मचारी कमला महताराले सावाँ र ब्याज गरि १ करोड २४ लाख ९८ हजार ८ सय ३७ रुपैंया बुझाउन पर्ने भनि सुचना प्रकाशन गरेको हो।
फर्जी ऋणी तयार गरि कर्मचारीले नै रकम हिनामिना गरेको प्युठान नगरपालिका वडा–४ का वडाध्यक्ष रेशम कार्कीले बताए।करीव ३ वर्ष पहिला यी दुई कर्मचारीले संस्थाका केहि सदस्यहरुलाई ऋणी बनाई आफुहरुले रकम अपचलन गरेको हुँदा रकम असुलीको लागि कानुन बमोजिम प्रक्रिया अगाडी बढाउनुपर्ने वडाध्यक्ष कार्कीको भनाई छ।
प्युठान नगरपालिकाका नगर प्रमुख बिष्णु बहादुर योगीले नगरपालिकाले निरन्तर रुपमा फलो गरेको बताउंदै सिए बोलाएर सहकारीको लेखा परिक्षण समेत गराएको बताए।करिव ३ वर्ष अघि देखी छलफल,अन्तरक्रिया र तमसुक बनाउने काम हुँदा समेत ऋणी कर्मचारीले ऋण हालसम्म नबुझाएकोले संस्था कानुनी प्रक्रियामा गएको नगर प्रमुख योगीको भनाई छ।
प्युठान नगरपालिकाका सहकारी शाखा प्रमुख चन्द्र जिसीले अपचलन गरेका ति दुई कर्मचारीहरुले तमसुक बनाई हालसम्म पैसा नतिरेपछी सहकारी कानुनी प्रक्रियामा लागेको बताए।
उता दैनिक बचत संकलन गर्ने कर्मचारी कमला महतराले तत्कालिन प्रवन्धक प्रतिमा जी एमले रकम हिनामिना गरेको र आफुलाई फसाएको आरोप लगाएकी छिन्।‘म कार्यालय सहयोगी र दैनिक बचत संकलनकर्ताको जिम्मेवारीमा रही काम गर्थे।’उनले भनिन–सहकारी संस्थाको चेक मेरो नाममा काटेर बैंकमा साट्न लगाई तत्कालिन प्रवन्धकलाई नगद पैसा दिएको थिए भने कतिपय आफन्तीलाई समेत आई एम ई बाट समेत पैसा पठाई दिएको थिए।’ थप्दै उनले भनिन-‘संस्थाबाट मैले लिएको रकम १५ लाख मात्र थिए।’सामान्य कम्युटरको ज्ञान समेत नभएको हुँदा हाकिमले आफुले तिरेको कतिपय रकम समेत सिस्टममा नराखेको उनले बताईन।
पत्रिकामा सुचना प्रकाशन गरेको रकम साँचो नभएको तत्कालीन प्रवन्धक प्रतिमा जी एमले बताइन।आफुले ब्यत्तिगत रुपमा संस्थाबाट ५ लाख रुपैया कर्जा लिएको बताउदै मरो नाममा देखिएको बाकी रकम कसरि अपचलन भयो आफुलाई थाहा नभएको उनले बताइन।
सहकारी ऐन २०७४ र सहकारी नियमावली २०७५ अनुसार यो सहकारी स्थानीय तहको नियमन क्षेत्राधिकार भित्र पर्ने हुँदा रकम अपचलन गर्ने कर्मचारीबाट रकम फिर्ताको लागि पालिकाको समन्वय पक्ष फितलो देखिएको हुँदा हालसम्म पनि अपचलन रकम फिर्ता समस्या देखिएको जिल्ला सहकारी संघ प्युठानका अध्यक्ष सुशील पोखरेलले बताए।
यता बिजुवार महिला साना किसान कृषि सहकारी संस्थाका प्रवन्धक शान्ता पण्डितले लामो समयदेखी उहाँहरुसँग छलफल गर्ने, वडा, प्युठान नगरपालिकाको कार्यालय र जिल्ला प्रशासन कार्यालय प्युठानमा समेत पुगी तमसुक बनाएता पनि ऋण नतिरेकोले संस्था कानुनि प्रक्रियामा जान बाध्य छ।संस्थाको विनियम नगरपालिकाको सहकारी ऐन र राज्यको सहकारी ऐन र नियमावली अनुसार रकम असुली प्रक्रियामा गएको संस्थाका प्रवन्धक पण्डितले बताईन।
