प्यूठान।प्युठानकै लामो र अग्लो स्थानमा भएको झोलंगे पुल आज उद्घाटन भएको छ। गौमुखी गाउँपालिका स्थित अर्खा र रजवारा जोड्ने जिल्लाकै अग्लो र लामो झोलुंगे पुलको प्यूठानका प्रतिनिधीसभा सदस्य सूर्य थापाले उद्घाटन गरेका हुन्।
गाउँपालिकाको वडा नम्वर ४ स्थित अर्खा लामीडाँडा र गौमुखी वडा नम्वर १ स्थित रजवाराको देउरालीलाई जोड्ने गरी पुल निर्माण गरिएको हो।पछिल्लो समय यो पुल आन्तरिक एवं बाह्य पर्यटकहरुका लागि रोजाईको केन्द्र बनेको छ। पुलको लम्बाई ३ सय ७३ दशमलव ८० मिटर र उचाई १ सय ८० मिटर छ ।
यसअघि झण्डै डेढ घण्टा लाग्ने पैदल यात्रा अब पुल निर्माण भएसँगै आधा घण्टामै छोट्टिएको छ। पुलले विशेषगरी विद्यार्थी, बिरामी तथा कृषक वर्गलाई निकै राहत हुनेछ।
२०८१ सालको जेठ महिनामा दुई करोड ७२ लाख ७४ हजार रुपैयाँ लागतमा ठेक्का सम्झौता भएको यो पुलको निर्माण कार्य अधिकारी/अपर तामाकोशी जेभीले सम्पन्न गरेको हो।
यस पुल सञ्चालनमा आएसँगै दैनिक आवतजावतमा धेरै सहज भएको स्थानीयहरु बताउछन्।
