प्युठान। नेपाली सेनाको वर्द बहादुर गण प्युठान खलङ्गाले बिहिबार माण्डवी गाउँपालिकाको कार्यालय परिसरमा विपद् अभ्यासको डेमो प्रर्दशन गरेको छ ।
मानवीय क्षति कम गर्न उद्धारको कार्यमा सक्रिय हुन, घाइतेको स्वास्थ्य उपचार, जोखिममा परेका मानिसको सुरक्षित स्थानमा स्थानान्तरण, अति आवश्यक सुविधाको व्यवस्थापन र स्वास्थ्य प्रकोप हुन नदिने विषयमा नेपाली सेनाले कृतिम घटनाको अभ्यास प्रदर्शन गरेको हो।
अभ्यासमा बाढी, पहिरो, डुबान र आगलागीबाट प्रभावितहरूको स्थिति हेरी नागरिकको उद्वार घाइतेहरूलाई प्राथमिक उपचारका लागि सुरक्षित स्थानमा राख्ने, अशक्त भएकालाई प्राथमिक उपचार सँगै चाँडो सुविधा सम्पन्न अस्पतालमा लाने लगायतका डेमो प्रदर्शन गरिएको थियो।
प्रदर्शनी कार्यक्रममा कृत्रिम घटना अभ्यासका लागि, लाइफ ज्याकेट,फायर किट, र्याकर,झटपट झोला, क्याराबिना, मेडिकल सामाग्री, रिस्क्यु रोप, थ्रु ब्याग, विभिन्न औजार तथा उपकरण सहित बन्दोबस्तीका सामग्रीहरु नेपाली सेनाले प्रयोग गरेको थियो।कार्यक्रममा नेपाली सेनाका वर्द बहादुर गण खलङ्गाका उपसेनानी रामु आलेले सामुदायिक विपद प्रतिकार्य सम्बन्धी प्रस्तुतिकरण गरेका थिए। उपसेनानी आलेले समाजमा हुने हरेक प्रकारका विपत्तिमा नेपाली सेना, नेपाल प्रहरी, सरकार, नागरिक र विपत्प्रतिकार्य तालिम प्राप्त नागरिकको सहकार्य हुनुपर्ने उल्लेख गरे ।
