प्युठान। प्युठानमा ३ हजार ५ सय ९० जना नयाँ मतदाता थपिएका छन्।
आगामी फागुन २१ गते हुने प्रतिनिधि सभा सदस्य निर्वाचनका लागि असोज १० देखि मंसिर ५ गतेसम्ममा मतदाता दर्ता खुल्ला गरिएको अवधिमा सो परिणाममा नयाँ मतदाताले नाम दर्ता गराएका हुन्।
असोज १० गतेदेखि मंसिर ५ गतेसम्मको अवधिमा कार्यालयमै पुगेर र राष्ट्रिय परिचय–पत्र मार्फत अनलाईनबाट मतदाता नामावली दर्ताका लागि खुला गरिएको थियो।
सोही अवधिमा कार्यालयमै गएर १ हजार २ सय ५७ जना जसमध्ये ४ सय २६ जना महिला र ८ सय ३१ जना पुरुष रहेका छन्।अनलाईनको माध्यमबाट २ हजार ४ सय ३३ जना छन्।कुल ३ हजार ५ सय ९० जना नयाँ मतदाता नामावलीमा नाम दर्ता गरेको जिल्ला निर्वाचन कार्यालय प्युठानका जिल्ला निर्वाचन अधिकारी पदम बहादुर डाँगीले जानकारी दिए।
कार्यालयले दिएको जानकारी अनुसार कार्यालयमै उपस्थित भएर मतदाता नामावलीमा नाम दर्ता गर्ने भन्दा राष्ट्रिय परिचय–पत्रको माध्यमबाट अनलाईन दर्ता गर्नेको संख्या बढी रहेको छ।मतदाता नामावलीमा नाम दर्ता गराउनेमा १८ वर्षभन्दा माथिका युवाहरुको संख्या बढी रहेको कार्यालयले जनाएको छ।
त्यसैगरी, कार्यालयले १ सय ४२ जना त्रुटी सच्याउने र ६ सय ६८ जनाको नामसारी गर्ने काम समेत भएको कार्यालय प्रमुख डाँगीले जानकारी दिए।
प्युठानमा २०७९ को निर्वाचनमा १ लाख ६१ हजार ६ सय ८० जना मतदाता थिए।जसमध्ये पुरुष मतदाता ७८ हजार ९ सय ५९ र महिला मतदाता ८२ हजार ७ सय २० र अन्य १ जना मतदाता थिए।
