सरुमारानीमा अनुगमन

  स्वर्गद्वारी अपडेट ,प्युठान जिल्ला प्रशासन कार्यालय प्युठान तथा ईलाका प्रशासन कार्यालय जस्पुर प्युठान बाट खटिएको अनुगमन टोलीले बुधबार सरुमारानी गाउँपालिकाको दर्भान बजार तथा बडडाँडा स्थित औषधी पसलहरु पोलीक्लिनिक र  स्वास्थ्य क्लिनिकहरुको अनुगमन गरेको छ । आम जनताको स्वास्थ्यमा प्रतिकुल असर पर्ने गरि कुनै पनि कार्य हुन नदिने र उपभोक्ता हकहितको संरक्षण गर्ने एवं स्वास्थ्य संस्थाहरुले प्रचलित ऐन कानुनमा भएको व्यवस्थाको अक्षरश परिपालना नगरेको अवस्थालाई मध्यनजर गर्दै कडाईका साथ अनुगमन गर्ने कार्यलाई निरन्तरता दिएको इलाका प्रसासन कार्यालय जस्पुर प्रमुख बाबुराम पुरीले बताए । औषधी पसल तथा फार्मेशीहरुले औषधी व्यवस्था ऐन नियमावली औषधी बिक्रि स्थलमा फर्माशिष्ट वा फार्मेशी सहायक समेत नराख्ने तथा उपभोक्ता हित संरक्षण ऐन नियमावली बमोजिम बिल बिजक नराख्ने बिक्रि बिल नदिने लगायतका गैरकानुनी कार्यहरु पटक-पटक गरिएका अनुगमनका क्रममा पाईएको हुँदा त्यस्ता अनुचित व्यापारिक तथा व्यावसायजन्य क्रियाकलापहरुलाई निरुत्साहित गर्ने उद्देश्यले अनुगमनलाई तिब्रता दिएको पुरीले बताए। सरुमारानी गाउँपालिकाको दर्भान बजार स्थित एउटा पोलीक्लिनिक २  वटा फार्मेशी तथा बडडाँडा स्थित १ वटा स्वास्थ्य क्लिनिकको अनुगमन गरिएको थियो । अनुगमनको क्रममा औषधी पसलहरु फर्माशिष्ट वा फार्मेशी सहायक विना संचालन गरिएको , स्वास्थ्य क्लिनिक दर्ता नगरिएको , बिल बिजक व्यवस्थित नराख्ने तथा बिक्रि बिल समेत नदिने गरेको पाईएको छ । अनुगमन गरिएका सबै स्वास्थ्य संस्थाहरुलाई प्रचलित कानुन बमोजिम कडा कारवाही गर्ने चेतावनी सहित निर्देशन दिईएका विषयहरु यथाशिघ्र पुरा गर्न पन्ध्र  दिनको अल्टिमेटम समेत दिईएको सहायक प्रमुख जिल्ला अधिकारी गोबिन्द अधिकारीले बताए। जिल्लाको अन्य क्षेत्रमा समेत अनुगमनलाई तिब्रता दिईने र शुन्य सहनशिलता सहित अब गरिने अनुगमनमा औषधी व्यवस्था विभाग लगायतका अन्य नियमनकारी निकायको समेत सहभागिता रहनेछन् अधिकारी भने । अनुगमन टोलीमा जिल्ला प्रशासन कार्यालय प्युठानका सहायक प्रमुख जिल्ला अधिकारी गोबिन्द प्रसाद, अधिकारी ईलाका प्रशासन कार्यालय जस्पुरका प्रमुख बाबुराम पुरी सरुमारानी,  गाउँपालिकाका स्वास्थ्य शाखा प्रमुख टेकेन्द्र रायमाझी ईलाका प्रशासन कार्यालय जसपुरका कम्पयुटर अपरेटर प्रितम श्रेष्ठ ,प्रहरी चौकी ढुंगेगढीका प्रहरी सहायक निरिक्षक प्रेम बहादुर भण्डारी ,र प्रहरी चौकी बड्डाँडाका प्रहरी सहायक निरिक्षक गुरीलाल चौधरी सहभागी थिए ।