प्यूठानका ३८ हजार बालबालिकालाई खोप लगाइदै

अनुज पछाई,प्यूठान । स्वास्थ्य कार्यालय प्यूठानले दोस्रो चरणमा जिल्लाका ५ देखि १२ वर्षमुनिका बालबालिकाका लागि कोरोना भाइरस विरुद्धको खोप लगाउने भएको छ । भदौ ५ गतेदेखि ११ गतेसम्म कोरोना भाइरस विरुद्धको खोपको पहिलो मात्रा दिइने छ । स्वास्थ्य कार्यालय प्यूठानका प्रमुख मधुसुदन खडकाको अनुसार दोस्रो चरणमा प्यूठान जिल्लाका ३८ हजार ४९४ बालबाबालिकालाई कोरोना विरुद्धको खोप ‘फाइजर बायोएनटेक’ दिन लागिएको हो । भदौ ५ गतेदेखि ११ गतेसम्म पहिलो मात्रा लगाएका बालबालिकालाई दोस्रो मात्रा भदौ २७ देखि असोज १ गतेसम्म सञ्चालन गरिने छ । यसअघि २७ जिल्लाका बालबालिकालाई कोरोना भाइरस विरुद्धको खोप लगाइएको थियो । बालबालिकालाई विद्यालयमा नै खोप केन्द्र स्थापना स्थापना गरेर खोप लगाइने छ । ५ देखि १२ वर्षमुनिका उमेरका विद्यालयले तयार गरेको कक्षागत सूची, नामावली, विद्यालयले उपलब्ध गराएको परिचयपत्रका आधारमा खोप लगाइने छ । यस्तै विद्यालयमा सूचीकृत नभएका बालबालिकाहरूको हकमा उमेर खुल्ने परिचयपत्र वा निजको अभिभावकले स्वघोषणा गरेको उमेर पुगेका बालबालिकालाई खोप लगाइने छ । प्यूठान सहित लुम्बिनी प्रदेशका कपिलवस्तु, अर्घाखाँची, गुल्मी, पाल्पा, रोल्पा, पूर्वी रुकुमका सहित ५० जिल्लाका बालबालिकालाई खोप प्रदान गरिने छ ।