प्युठान।उत्पादनमा वृद्धि गर्ने अभियानका साथ प्युठानको दुई स्थानीय तहहरुमा कृषकहरुको खेतीयोग्य जमिनको माटो परीक्षण गरिएको छ ।एकीकृत कृषि तथा पशुपंक्षि विकास कार्यालय प्यूठानको आयोजना र माटो तथा मल परिक्षण प्रयोगशाला खजुरा बाँकेको प्राविधिक सहयोगमा सरुमारानी गाउँपालिका र नौबहिनी गाउँपालिकामा रहेका माटो परिक्षण गरिएको छ ।
बुधबार नौबहिनी गाउँपालिकाको बाहानेमा १ सय ३५ जना कृषकहरुको कृषियोग्य जमिनको माटो परिक्षण गरिएको गाउँपालिकाका कृषि शाखा प्रमुख समुन्द्र केसीले बताए । पालिकाका सबै वडाबाट कृषकहरुले संकलन गरेर शिविरसम्म ल्याइएको माटोलाई परिक्षण गरिएको उनले बताए।
नौबहिनी गाउँपालिकाका प्रमुख प्रशासकीय अधिकृत शिवराज पौडेलले माटो परिक्षण कृषि जगतमा निकै महत्त्वपूर्ण खुड्किला भएको बताए । पालिकाका हरेक वडामा यसलाई अभियानको रुपमा लगेर वस्तुवादी नतिजा दिन सके आत्मनिर्भर कृषि उत्पादनमा ठुलो राहत हुने अधिकृत पौडेलको भनाई छ।
![](https://sworgadwariupdate.com/wp-content/uploads/2024/06/maato-lab-2-1200x540.jpg)
त्यस्तै मंगलबार सरुमारानी गाउँपालिकाबाट १ सय ४ जनाको कृषि योग्य जमिनबाट ल्याइएको स्याम्पलबाट सुरु गरिएको माटो परिक्षण कार्यक्रम ऐरावतीमा गएर समापन गरिने एकीकृत कृषि तथा पशुपंक्षि विकास कार्यक्रम प्युठानका निमित्त प्रमुख उमेशचन्द्र श्रेष्ठले जानकारी दिए । उनले माटो परिक्षण कार्यक्रमले कृषि उत्पादनको सम्भाव्यता अध्ययनमा ठुलो सहयोग गर्ने हुनाले यो कार्यक्रम हरेक कृषियोग्य जमिनमा अनिवार्य रहेको बताए ।
माटो परिक्षण खेती गर्नुपूर्व गरेर सोहो अनुरुपको बीउविजनको वितरणमा ध्यान दिन सके कृषि उत्पादनमा मुनाफा हुने मल परिक्षण प्रयोगशाला खजुरा बाँकेका माटो प्राविधिक तिलकबहादुर केसीले बताए । उनले विभिन्न निकायहरुको सहयोगमा लुम्बिनी प्रदेशका सबै जिल्लामा माटो परिक्षण अभियान थालिएको पनि बताए ।